Het is allebei mooi

Henk Wolbers, Keurnoot oet Börk, schreef de column ‘Praotie’. Over het mooie landschap in de provincie Drenthe, maar ook over de streektaal Drents. Natuurlijk schreef Wolbers zijn gedachtespinsels in zijn eigen streektaal:

Het jaor is al weer bijna twee maond an de gang as ik de laptop op de schoot pak en terugge gao naor tussen de Kerst en Neijaor.

Veur oeze soos verzörg ik dan met mien vriend een wandeltocht met eten veur ongeveer 50 personen en dat doe wij dan in Duutslaand bij oeze Oosterburen.

We bint daor 4 dagen drok met.

Eerst een eetgelegenheid oetzuuken en natuurlijk ok pruven. Meestal gaot wij een paar lokaties bezuuken, um een keuze te kunnen maken.

Dan de umgeving verkennen en een route van ongeveer 6 km oetzetten. Vervolgens nog een dag um met 2 aanderen de route te controleren en as die zegt dat het goed is, dan giet het deur. Dat doet wij al 13 jaor.

Maor dit jaor bleven wij in Drenthe, vlakbij, een wandeling over het Drouwenerzand. Veul deelnimmers waren daor nog nooit west en ze vunden het een fantastische route. Ze reageerden: ”Wat hef Drenthe toch mooie plekkies; daorveur huuf wij niet naor de Oosterburen.”

Veur mien vrijwilligerswark in het verzörgingshoes moet ik de kerstbomen weer opruumen. We zaten eem koffie te drinken met een knieppertie erbij toen er een bewoner ankomp veur een kop koffie. Ik vreug waor e weg kwam. Hij vertelde dat e oet het westen kwam, 81 jaor was en zien kinder hier woonden. Toen ik vreug of hij een knieppertie hebben wol, begreep hij dat eerst niet. Toen ik hem ien gaf zee e dat hij dat woord knieppertie niet vergeten zul.

En wat mij goed deur was dat hij tegen mij zee dat ik maor Drèens tegen hum praoten mus. Hij woonde nog maor 2 maonden hier en vund het Drèens een mooie taoltie en hij wol zien best doen um het nog te leren.

Dat is toch mooi en ie bent nooit te old um Drèens te leren.

Hieroet blek wal weer dat de Drèense taol en het Drèense landschap allebei mooi bint.