Kampioenschap van Hooghaolen

Grietje Bakker, streektaalvrijwilliger vindt het leuk, samen met andere inwoners uit Hooghalen, actief te zijn op de jeu de boulesbaan. Deze baan ligt naast het dorpshuis in haar woonplaats, Hooghalen:

Op wonsdagaovend tegen een uur of zeuven gaon een koppeltie jonge Haoler senioren richting het Haolerhoes in Hooghaolen. Een tassie met ballen in de haand of in de fietstas.

Met een brede glimlach verzaomeln ze zich an de raand van de jeu de boules-baon.

Een enkeling probeert de baon oet en de organisaotie is gaangs met de indeling van de teams.

De tegenstanders worden inschat en under goedbedoelde intimidaoties richting tegenpartij giet het spel van start.

Der worden twei ( soms drei) partijen tegeliek speuld.

Ingetogen luudruchtig schallen de anwiezings over de baon, volgd deur of een wanhopig gebaor na een mislukte poging.

Wat neisgierige dörpsgenoten komen op het rumoer aof en kieken verbaosd hoe grote mensen met ballen speulen.

‘Over links, over rechts, deur de midden, gao deur veur liggen’; anwiezings die der toe doen, maor vaoker niet as wel lukken.

Het team dat as eerste 13 punten bij mekaar gooit hef is winnaor.

Der is ok een ‘VAR’, niet met een beeldscharm, maor ene die gewaopend met meetlint verig deur de kneien zakt om sekuur vast te stellen wel het dichtste bij het kleine ballegie lig.

De speulers kieken kritisch met op corona-aofstand.

Spannend is het altied. Al stao je ok met 12-1 achter, kuj in een paor series asnog met 13-12 winnen.

Nao aofloop nemen wij de beste en de slechtste worpen nog even deur en ondertied proosten wij vanzölf in Franse stijl op de winnaors, maor veuraal op de gezelligheid.

In september dan giet het er echt om!!

Op de verlichte baonen wordt er speuld om het kampioenschap van Hooghaolen en dit jaor volgens een neie rekenmethode van oeze neie competitiebaos.

Gienene die het snapt, maor de baos snapt het en het maokt oes niks oet. Wij vinden alles goed.

De kampioenen gaon met de beker en een fles Franse wien naor hoes.

En wij bint allemaol kampioen gezelligheid…

Grietje Bakker, streektaolvrijwilliger uut Hooghaolen.