Slaopen

Reina Geuzinge is streektaalvrijwilligster uit Wijster en verzorgt deze week het Praotie:

Men vund dat wij, gezien oeze leeftied, beneden mussen gaon slaopen. De ruumte was er ja wel. Nao wat geprakkizeer zul het gebeuren.

Het was nog niet zo ienvoldig. Want in die ruumte stun een biljart en die verplaots ie niet zo maor. Daor mot een bedrief veur kommen. En de ruumte veur het biljart, daor stun nog de teunbaank. Maor daor har oenze zeun wal belang bij as warkbaank en er zaten nog lagies in um van alles in op te bargen.

Zo gebeurde. Teunbaank weg, biljart verhoesd. De radio meldde iniens dat er ‘s aovends een lockdown ofkondigd zul worden. Dan moe’w vanmiddag nog rap varf en laminaat halen, want aans kuw niks doen. Dat lukte allemaol. Mien man gung varven en de hulptroepen kwamen het laminaat leggen.

De volgende mörgen kwamen ze het bedde naor beneden halen en weer in mekaar zetten. Alles in örder.

Wij ‘s aovends met goeie moed hen bedde. Wat zullen wij slaopen! Mien man lag al en ik zul ok gaon liggen. Het kraakte wal wat. ‘Gef niks, gao maor liggen.’ Ik gao liggen, wat gekraak en klaboem! Daor zakten wij deur het bedde.

Wat nou? Je kunt um dis tied ok gienien bellen. Dan de matrassen der maor oet en op de grond. Wij hebt niet best slaopen, maor het was niet aans. De volgende dag de hulptroepen maor beld. Die kwamen en keken. Oh, een kwestie van een paar neie latten en een poot. Wat hebbe wij die aovend geweldig slaopen!